10 სერიალი, რომლითაც ხანგრძლივი ფრენისას დროს მარტივად მოკლავ

ბილეთი ნაყიდი გაქვს, სასტუმრო დაჯავშნილია, ბარგი ჩალაგებულია — ისღა დაგრჩენია მოიფიქრო, თუ როგორ გაიყვან დროს თვითმფრინავში რამდენიმე საათიანი მგზავრობისას.

არადა, როგორც ყველაფერი გენიალური, ამ თავსატეხის პასუხიც მეტისმეტად მარტივია: მართალია, თვითმფრინავით მგზავრობა, შეიძლება, გარკვეულ დისკომფორტთან ასოცირდებოდეს, მაგრამ ეს პროცესი იდეალურია სერიალის საყურებლად. რატომ? ზიხარ მყუდროდ მშვიდ გარემოში, საკვებს ადგილზე მოგართმევენ და თან დრო თავზე საყრელად გაქვს, ეს კი სწორედ საუკეთესო გარემოა ახალი სატელევიზიო შოუს სანახავად. ასე კი ორ კურდღელს ერთდროულად დაიჭერ: მგზავრობის დრო თვალის დახამხამებაში გავა და ახალ საინტერესო სერიალსაც ნახავ.

სწორედ ასეთ შემთხვევებში სანახავი სერიალები წინასწარ შეგირჩიეთ, გაფრენის წინ კი უბრალოდ მგზავრობის ზუსტი ხანგრძლივობა უნდა გადაამოწმო და ქვემოთ ჩამოთვლილი სერიალებიდან შესაბამისი შეარჩიო.

1. The End of the Fucking World

ხანგრძლივობა: 5.7 საათი, ორი სეზონი

ეს ბრიტანული კომედიური დრამა, ალბათ, საუკეთესო რამაა, რაც კი შეიძლება მგზავრობისას ნახო: ჯეიმსისა და ალისას მოულოდნელობებით სავსე თავგადასავალი წამითაც კი არ მოგაწყენს თავისი საოცარი შავი იუმორითა და უჩვეულო ტრაგიზმით.

2. Fleabag

ხანგრძლივობა: 5 საათი, ორი სეზონი

თუ ამ სერიალის ყურებას გადაწყვეტ, მგზავრობა ნამდვილად დაუვიწყარი გახდება, რადგან ბორტზე მყოფ ყველა მგზავრს დაამახსოვრდება შენი გაუჩერებელი სიცილი.

3. Maniac

ხანგრძლივობა: 6.5 საათი, ერთი სეზონი

თუ თვითმფრინავით მგზავრობა ძალიან გაშინებს, მაშინ ეს სერიალი პირდაპირ ზედგამოჭრილია შენთვის: ემა სტოუნისა და ჯონა ჰილის პერსონაჟებთან ერთად ფრენის დასრულებამდე, შესაძლოა, საკუთარ შიშებთან გამკლავების გზაც კი იპოვო.

4. Sex Education

ხანგრძლივობა: 8 საათი, ერთი სეზონი

ჰო, ცოტა უცნაური იქნება ამ სერიალის ყურება იმ შემთხვევაში, თუ ეკრანს ბორტზე მყოფი სხვა ბევრი მგზავრიც ადევნებს თვალს, მაგრამ თუ შენთვის კოხტად ზიხარ ფანჯრის მხარეს, მაშინ ნეტფლიქსის ამ ერთ-ერთ საუკეთესო სერიალთან ერთად შთამბეჭდავ დროს გაატარებ.

5. Sharp Objects

ხანგრძლივობა: 8 საათი, ერთი სეზონი

თუ გასაოცარი მოგზაურობიდან იმ ადგილას ბრუნდები, საითკენაც გული დიდად არ მიგიწევს, მაშინ HBO-ს ეს სერიალი სწორედ შენთვისაა: ემი ადამსის პერსონაჟიც თავის საძულველ მშობლიურ ქალაქში ბრუნდება. თუმცა, ამის გარეშეც თუ მისტიკური კრიმინალური ისტორიები გიტაცებს, ამ სერიალის წყალობით წარმოუდგენელი ემოციებით სავსე რვა საათი გელოდება წინ.

6. The Haunting of Hill House

ხანგრძლივობა: 9.5 საათი, ერთი სეზონი

თუ ფრენის გეშინია და ყურადღება სხვა რამეზე გინდა გადაიტანო, ან პირიქით, საერთოდ არ გეშინია და ადრენალინის დამატებითი დოზა გჭირდება, ამაში ეს ერთ-ერთი (ერთადერთი თუ არა) საუკეთესო საშინელებათა ჟანრის სერიალი დაგეხმარება.

7. Killing Eve

ხანგრძლივობა: 11 საათი, ორი სეზონი

სერიული მკვლელების ისტორიები თუ გიტაცებს, BBC-ის ეს სატელევიზიო შოუ სრულიად ახალ და უნიკალური ხელწერის მქონე ბოროტმოქმედს გაგაცნობთ: ვილანელის დაუჯერებელი სისასტიკით ჩადენილი მკვლელობების გამოძიება თქვენს მოგზაურობას კრიმინალურ თავგადასავლად გადააქცევს.

8. The Boys

ხანგრძლივობა: 8 საათი, ერთი სეზონი

სუპერგმირების ისტორიები ვისაც განსაკუთრებულად უყვარს და ეს ახალი სატელევიზიო შოუ ჯერ არ უნახავს, მომავალი მოგზაურობა თუნდაც იმიტომ უნდა დაგეგმოს, რომ Amazon-ის ამ საინტერესო პროექტით დატკბეს.

9. Chernobyl

ხანგრძლივობა: 5 საათი, ერთი სეზონი

თუ გიყვარს ეკრანზე გაცოცხლებულ ისტორიულ მოვლენებზე თვალის მიდევნება, მაშინ ეს სერიალი იმედს არ გაგიცრუებს: უახლოესი წარსულიდან ცნობილი ჩერნობილის ტრაგედიის შესახებ HBO-მ ერთობ შთამბეჭდავი სატელევიზიო შოუ გადაიღო.

10. Unbelievable

ხანგრძლივობა: 6.4 საათი, ერთი სეზონი

ნამდვილი ისტორიების მოსმენა გიყვარს? მაშინ ამ სერიალს აუცილებლად უნდა უყუროთ, რადგან ისეთ დაუჯერებელ ამბავზე მოგვითხრობს, რომ მსგავსი რამ მართლაც იშვიათად გვსმენია ცხოვრებაში, არადა, თითქმის, ყოველდღე ხდება.

გაინტერესებს, სად უნდა იპოვო ყველაზე იაფი ავიაბილეთები? Aviabiletebi.org სწორედ ამისთვის შექმნილი პლატფორმაა. მისი აპლიკაცია, რომელიც ხელმისაწვდომია როგორც ანდროიდის, ისე iOS სისტემისთვის საშუალებას გაძლევთ, ბილეთების გარდა, ერთ სივრცეში მოძებნოთ სასტუმროებიც, ჰოსტელებიც და Airbnb-ის ბინებიც.